مأساة طالب في الثانوية العامة ~ٍِْ

من طرف **dm3a** الأربعاء فبراير 10, 2010 1:53 pm

ياااااااااااااااااه..!!!
الوقت جرى ومر بسرعه والامتحانات على الابواب الواحد مش عارف يعمل ايه بس؟؟؟
لا المنهج خلص ولا المذاكره ليها طعم ....
صحيح الواحد كل يوم مقطع نفسه مذاكره قدام النت وشاشه التليفزيون لكن للاسف مفيش فايده...
و الواحد مش عارف يجمع المنهج خالص ........
بس لو يعملوا ملخص للمسلسلات والافلام دى؟
ولا حتى ملازم كده لقناه مزيكا وزوم !!
مش كان الواحد عرف يلم نفسه فى وقت أقصر!!

ولايا خوفى من منهج البلاى ستيشن يااااه صعب صعب جدا الواحد مش بيلحق يخلصه خالص !!
طب وبعدين ياخوينا عايز مساعده ضرورى ...محدش يعرف اجيب الملخصات دى منين؟؟؟
دى مصيبه ....ده حتى المدرسين الخصوصيين مفيش فايده فيهم ومحدش مذاكر المنهج ده اساسا....
المصيبه الاكبرمش فينا احنا يا طلاب الثانويه العامه ....
لاء دى فى العيال الصغننه بتوع الكى جى.....دول بجد حالهم صعب جدا ومنهجهم مش سهل خالص...
محدش قادر يلم لهم منهج الكارتون و سبيس تون كمان ماشيه بتجرى بالاحداث دون مراعاه لصغر سن الولاد ولا لقدرتهم على التركيز .. تلاقى المسلسل من دول ايه خلص اوام ولا حلقات ام بى 3 مش ممكن
احداث ورا احداث…….. بجد حاجه صعب خالص..

الواحد خلالالالالالالالاص تعب من التزامات المذاكره دى....
امتى الواحد يخلص بقى عشان نخش على مناهج الجامعه السهله ....وال فيها فارايتى اكبر وتنوع مالوش حدود!!
انا ليا واحد صاحبى فى الجامعه بيشكر فى المناهج اوى اوى....
بيقول سهله مووت وحلوه ومش صعبه خالص..
يعنى فروع كتير اوى ..... بس بيقولى ان المحاضرات كلها بتكون فى اماكن جميله وتفتح النفس ...
مره سينيما ومره كافى شوب ...ومره جنينه ....يعنى محدش يحس بالملل بتاع الفصول المغلقه دى.!!
ولا السكاشن !!
الله الله على السكاشن وجمالها
كل واحد يقدر يعمل سكشن لوحده فى المكان ال يعجبه الوقت ال مناسب له مع الجروب ال يختاره حتى لو كانت طالبه واحده بس.....

"ده الكلام الجد بقى" يعنى فى تركيز وتخصص....

اما بالنسبه للمواد فكلها اختياريه والاختيارات كلها " كول ونايس جدا " وطبعا المناهج دى بقى هى ال الواحد مستنيها بفارغ الصبر
يارب هونها علينا بقى الواحد تعب ونفسه يرتاح بقى.
انا هاظبط نفسى فى الكليه وهاذاكر من اول يوم هاخش على المناهج بنفس مفتوحه وتفاؤل شديد انا ناوى اتخرج بامتياز ومرتبه الشرف واسمى يتحط فى لوحه الطلاب المتفوقين وياريت لو عرفت اخد الدكتوراه ولا الواحد يتعين معيد ويذاكر بقى للاجيال الاصغر دى تبقى بجد حاجه فيها تجديد وتغير واضافه تحسب للواحد وتضيف ليه خبره اكبر واوسع على المستوى العلمى والشخصى ..
يارب انجح بقى...
انا بعد ماخلص الدردشه بتاعت النت ال بتطلع عينيا فيها كل يوم بس يارب تيجى بفايده فى الآخر.. هادعى ربنا ساعه الفجرأ قبل ما ادخل على السرير عدل ...انى نجح واعدى السنه دى بمجموع ماحصلش ..